Hirundoj

Sylvan Zaft

Fingroj prenas la penikon, movas ĝin
apud la tolsurfac', ne ankoraŭ tuŝante
dum la menso aktivas, bildigas al si
tion, kio videbliĝos per onta renkonto.

La hirundoj kreiĝis graciaj kaj sveltaj
por ke tiuj flugĉasu la predojn aerajn
nevideblajn al la okuloj artistaj.

Penikharoj farbiĝas, finfine surtolas
lasante, kreante liniojn angulajn
kurbajn, rektajn, ja-ajn – alpaletras
por novaj koloroj, por kromaj linioj.

Vidiĝas hommense aervojoj subpontaj,
alakvaj, deakvaj, tuj super la rivero,
tuj super la tero – elegantaj plumtiroj.